Kristian Pauli & Bárður spæla Monk

“Kristian Pauli Ellefsen og Bárður Reinert Poulsen spæla duo tann 28. desember á Blábar.

Hetta kvøldið fara teir at spæla løg hjá Thelonius Monk. Monk var ein tann størsti stílskaparin innan be-bop tónleikarørsluna, og var kendur fyri sítt kantuta og forvitnisliga máta at improvisera uppá. Samstundis er hann tað næst mest innspælda tónaskaldið innan jazz; bert Duke Ellington er frammanfyri. Monk var ein livandi mótsøgn, og tað var hansara tónleikur eisini. Tí verða hansara løg spæld ferð eftir ferð um allan heim, og Kristian Pauli og Bárður fara at gera sína bestu roynd á Blábar.

Teir fara eisini at spæla nøkur væl vald løg, sum teir sjálvir hava skrivað.“